Back Gent de pluja Catalan The Rain People Welsh Liebe niemals einen Fremden German The Rain People English The Rain People Basque مردمان باران Persian Sadeihmisiä Finnish Les Gens de la pluie French Non torno a casa stasera Italian 雨のなかの女 Japanese
|
C'l artìcul chè 'l è scrit in
Miranduléś |
 The Rain People
| ||
| Non torno a casa stasera | ||
 La Knight, Duvall, Caan e Aldredge in na figùra dal film | ||
| Mè a n tórn minga a cà stasìra 1969 | ||
|---|---|---|
| Regìa: Francis Ford Coppola | ||
| Scritōr: Francis Ford Coppola | ||
| Atōr: James Caan • Shirley Knight • Robert Duvall Andrew Duncan • Tom Aldredge • Laura Crews Marya Zimmet • Margaret Fairchild • Sally Gracie Alan Manson • Robert Modica • Eleanor Coppola | ||
| Müsica: Ronald Stein | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî | ||
Non torno a casa stasera (Mè a n tórn minga a cà stasìra) 'l è 'n film dramàtic dal 1969 ad Francis Ford Coppola ch'al 'l à anc scrit.
Al film 'l à vins la Concha 'd Òr a 'l Fèstival ad San Sebastiàṅ dal 1969.
Sunt
La śōvna Natalie Ravenna (Shirley Knight), raśdōra ad Long Island, quànd la s rénd cònt 'd aspitàr un putèṅ, la và in dal pànig. La lasa acsè scrit un bijét a sò marè Vinny (Robert Modica) e la decìd 'd andàr-'s-an via tulénd la màchina, sénsa 'n piàṅ precìś in tèsta. Lung la strada la cata 'n ragasòṅ èx śugadōr ad rugby, Jimmy Kilgannon (James Caan) dit “Killer”, ch'al gh admànda 'n pasàǵ e lē la 'l fà muntàr sù giùst p'r avér qualchidòṅ da dascórar. Chi lò, ch'al gh'à sèg na busta pîna 'd bèsi, al vrév èsar scarusâ a cà dla sò èx muróśa Elena (Laura Crews) par psēr tacàr a lauràr cun sò pàdar. Quànd 'l è là però l’Elena la gh dà adòs parchè la n s al pōl minga cumpatìr da quànd 'l è armàś uféś ciucànd la tèsta par tèra cascànd śò śugànd, adès par lē 'l è sōl 'n imbambî sénsa critèri, bòṅ sōl par catàr sù dal fój in di giardèṅ.
Dòp avér dit par telèfun a Vinny ch'la gh'à idéa 'd aburtìr, la vōl śbulugnàr via Jimmy ch'al gh'à 'l sarvèl 'd un putèṅ ma lē la gh 'n à abàsta di suo di prubléma e la n s pōl minga far-as càr'g anc ad qvéi ad chi àtar parchè la n è mia sò màdar. La gh cata 'n pòst in d'l alevamènt 'd Alfredo (Tom Aldredge), òṅ ch'al trata mâł al bèsti ch'al tira sù. La dóna la próa a mulàr-al da lò ma pò la bèca 'n vìgil, Gordon (Robert Duvall), ch'al taca a métar bèc in di sò fat, s'l'è spuśàda, cum è-la che sò marè al n è minga sèg, cuśa fà-la lè da par lē e via dascurénd. Chi lò al gh fà pò la multa parchè l'andàva tròp frònt e al gh diś ch'la gh'à da pagàr-la in d'l ufìsi 'd Alfredo. Lē la n vrév minga turnàr là p'r a n catàr piò Jimmy ma Gordon al s śibìs ad cumpagnàr-la e al pâr anc piutòst gustóś sèg. In cal méntar Killer 'l è drē a far un masèl parchè 'l à decìś ad libràr tut i pulśèṅ, i cunèṅ, al péguri, i clómb e i pruciòṅ d'l alevamènt. Alfredo 'l è incasâ négar, al s tîṅ dagnóra tut i sò bèsi p'r i dan e 'l órdna a la dóna ad purtàr-'s-al via.
Dòp avér dascargâ śò Killer, la Natalie la và a 'n apuntamènt cun Gordon in dla roulotte in du al viṿ cun sò fiōla pìcula dòp ch'la sò cà l'è bruśàda e lò 'l à pardû sò mujér e 'n fiōl masć. La baghéta l'è piutòst arvèrsa e la i tōś da spés acsè l'impàra a star a 'l mónd. Quànd la Natalie la càmbia idéa e la s tira indrē, lò al s incàsa 'd brut parchè al n la tōś minga tant bèṅ.